НӨАТ-ын буцаан олголтыг 5% болгох цахим өргөдөлд санал авч эхэллээ

НӨАТ-ын буцаан олголтыг 5% болгох цахим өргөдөлд санал авч эхэллээ

УИХ-ын “D-Parliament” цахим системд “Нийтийн өргөдөл” дэд цонх өнөөдөр нээгдэж, УИХ-ын дарга Г.Занданшатар, УИХ-ын гишүүн, ИЦББХ-ны дарга Э.Батшугар нар сэтгүүлчдэд мэдээлэл өглөө. 

Энэ үеэр НӨАТ-ын буцаан олголтыг 2% бус 5% болгон нэмэгдүүлэхэд иргэдээс санал авахаар болов. НӨАТ-ын иргэдэд олгодог буцаан олголтын хувь хэмжээг нэмэх нь аж ахуйн нэгжүүдийн орлогын бүртгэлийг сайжруулж, далд эдийн засгийг ил болгох, хувийн хэвшлийн өрсөлдөөний орчныг нэг болгох, төсөв бүрдүүлэх бусад татварын орлогыг нэмэгдүүлэх, иргэдийн татварын ачааллыг бууруулж, эдийн засгийн эргэлтийг нэмэгдүүлэх ач холбогдолтой гэдгийг эдийн засагч, судлаачид мэдээлж ирсэн. Тэгвэл энэ удаагийн “D-Parliament”-аар дамжуулан иргэд саналаа өгч, НӨАТ-ын буцаан олголтоо 5% болгох боломжтой болох нь. Тодруулбал,

  • Иргэд “D-Parliament” цахим хуудас, гар утасны аппликэйшнийг ашиглах бөгөөд бүртгэл танилт нэвтрэлтийн “Дан” системээр баталгаажих тул санал давхардах, хуурамч хаяг ашиглах боломжгүй юм байна. 
  • Цахим систем ашиглах боломжгүй бол төрийн цахим үйлчилгээний “Хурдан” цэгүүдээр дамжуулан өргөдөл гаргах, санал өгөх боломжтой. Одоогоор нийслэл болон орон нутаг, хилийн чанадад “Хурдан” цэгийн 130 салбар нээгдсэн байна.
  • Монгол Улсын үндэсний аюулгүй байдал, тусгаар тогтнолд заналхийлсэн, хүний эрх, эрх чөлөөг хязгаарласан, түүнд илтэд халдсан асуудлаар санал гаргах, санал авахыг хориглоно.
  • Иргэний гаргасан санал эхний 100 дэмжлэгийг авснаар тухайн өргөдлийг 30 хоногийн хугацаатайгаар системд байршуулна. Энэ хугацаанд иргэн доорх 3 төрлөөс сонгож тодорхой тооны дэмжлэгийг авах хэрэгтэй. 

Үүнд:

  • Тодорхой асуудлаар ажлын хэсэг байгуулах-33000 санал
  • Байнгын хорооны эрхлэх асуудлын хүрээнд хяналт шалгалт явуулах-70000 санал
  • УИХ-аар хэлэлцүүлж, шийдвэрлүүлэх-100000 санал

Тус системд хамгийн эхний өргөдөл болох НӨАТ-ын буцаан олголтыг 2 хувиас 5 хувь болгон нэмэгдүүлэх саналыг системд байршуулжээ. Нэмэгдсэн өртгийн албан татварын тухай хуульд өөрчлөлт оруулж, нэмэгдсэн өртгийн албан татварын буцаан олголтыг 5 хувиас доошгүй байхаар тогтоох тус санал 100 мянган дэмжлэг авбал УИХ-аар хэлэлцүүлэх юм. 

Энэ мэдээ танд ямар санагдав?

like
0
dislike
0
love
0
funny
0
angry
0
sad
0
wow
0